【環保基金 食享沙田】馬鞍山新港城收菜日常
2021年08月12日
【環保基金 食享沙田】馬鞍山新港城收菜日常
八月份開始，共享食物基金獲得環保基金資助，聯同沙田婦女會，喺沙田區多個街市繼續回收和分享剩食。區內嘅街市剩食回收工作唔經唔覺已踏入第十個年頭，小編日前就跟咗前線同事去馬鞍山新港城街市收菜，了解一下疫情下嘅最新情況。
雖然當晚落雨，但仍然無損一眾前線同事去回收剩食嘅決心。我哋喺大約晚上7點趁商戶就快收檔先去回收，咁就唔會影響到佢哋做生意。商戶都好熱心咁將佢地部分賣剩嘅商品捐贈俾我哋。整個收菜過程唔駛半個鐘，我哋已經收到為數不少嘅蔬菜，非常感激商戶佢地嘅捐贈同支持！喺現場作簡單分類之後，我哋就推住沉重嘅手推車上落斜，返回其中一個派發地點 – 沙田婦女會利安中心。我哋喺中心會合埋另外一邊喺利安街市做剩食回收嘅同事之後為回收得來嘅蔬菜秤重及篩選分配，完成分配剩食工作後就等待晚上8點15分嘅派菜時間。
我哋逢星期一至五晚都會將呢啲唔回收就會被丟去堆填區，但其實仲可以安全食用嘅剩食，同大約25個有需要嘅街坊或家庭分享。一到晚上8點15分，街坊都好有秩序咁排隊拎回收嘅蔬菜。我哋唔駛半個鐘就將當晚所有回收得來嘅蔬菜分派到有需要人士手上，大家都惜食不浪費。以上就係我哋利安呢邊嘅回收工作日常。