每年中秋都係一眾親朋戚友互送月餅嘅時候！咁多月餅自己未必食得晒，其實多出嚟嘅月餅，可以轉贈香港各大社福機構。中秋節後剩下嘅月餅盒、月餅盒或者罐都可以回收，為環保出一分力！下文將為大家整合港九新界回收月餅及月餅盒嘅機構、地址等，即刻睇文章了解吓啦！

月餅回收2023 | 1. 北河同行

相信大家對北河同行呢間社企都唔陌生，今年北河同行創辦人深水埗明哥，會繼續同佢嘅義工團隊收集月餅，然後以分配形式轉贈俾基層家庭、社福機構、獨居長者及有需要人士。想送出實體月餅嘅各位，可以喺9月28日或之前，將月餅拎到北河同行。將心意送出，令社會基層人士都可以感受到佳節氣氛。如果你嘅捐贈屬於大批、大量，記得要事先聯絡北河同行或明哥，以便安排。

收集日期：即日起至9月28日
回收地點：九龍深水埗大南街278號地下－北河同行
詳情：https://bitly.ws/VvY9

月餅回收2023 | 2. 長春社

過咗中秋節先發現屋企啲月餅食唔晒？咁大家可以考慮將月餅捐去長春社。佢哋喺10月13日或之前都會接收公眾嘅月餅捐贈，只要交去荃灣嘅「糧善關愛坊」就可以了。更特別嘅係，佢哋除咗可以回收傳統月餅，連冰皮月餅、雪糕月餅、未過期嘅月餅換領劵、節日水果或禮盒都收！只要包裝完整、未過最佳食用日期就得！

收集日期：即日起至10月13日
回收地點：荃灣梨木樹邨2座11號舖「糧善關愛坊」中心
詳情：https://bitly.ws/VvZ6

月餅回收2023 | 3. 惜食堂

惜食堂一向有做食物回收及轉贈活動，所以月餅都唔例外，就算係過咗中秋節都冇問題！如果大家有未開封嘅月餅（單個裝/禮盒裝）或者其他乾貨食物（食用期足四星期、非冷藏、非玻璃容器），都可以捐贈到惜食堂嘅「食物回收箱」或「食物捐贈機」。「食物回收箱」分別設置於15個領展商場，而全港有50間百佳超級市場都有「智能食物捐贈機」，仲有34部「食物捐贈機」放咗喺香港各大商場及屋苑！夠晒方便。

收集日期：沒有指定期限
回收地點及詳情：https://bitly.ws/VvZW

月餅回收2023 | 4. 共享食物基金

親戚送禮收到太多月餅？只要你啲月餅未開封、未過期，都可以拎去共享食物基金轉贈俾其他人！全盒或者散件裝都可以，最好有5-7日最佳食用日期就可以啦！如果大家有月餅以外嘅多餘食物，都可以一齊捐埋㗎，只要拎去佢哋嘅合作伙伴地點就得！

收集日期：沒有指定期限
接受月餅及食物捐贈的合作伙伴地址：https://bitly.ws/VAcW

月餅盒回收2023 | 1. 太古城中心

太古地產同惜食堂都有合辦「剩餘月餅捐贈計劃」收集月餅。另外綠領行動與太古地產、美心集團亦有聯合舉辦「月餅盒回收計劃」，會為大家收集及回收清潔乾淨嘅月餅盒。只要清潔乾淨，無論係紙盒定鐡盒都會接受。不過就要喺太古城中心先有回收點，比較適合住港島嘅朋友仔。

收集日期：即日起至10月13日
月餅回收地點：太古城中心2樓（顧客服務處對面 ）
月餅盒回收地點：太古城中心B2層（扶手電梯側）、地下（無印良品對面及niko and …對面）、2樓（顧客服務處對面）、3樓（近Giordano）、5樓（近MOViE MOViE Cityplaza！）
詳情：https://bitly.ws/VAfn

月餅盒回收2023 | 2. 奇華餅家

奇華餅家今年繼續同信和集團商場合辦「中秋月餅罐回收計劃」，仲送$20優惠券，環保之餘又有著數！只要喺10月20日前，將已妥善清潔嘅任何品牌金屬月餅罐/盒，交到9個指定商場禮賓處或服務台，就可以獲贈奇華餅家折扣優惠券$20元一張，S⁺ REWARDS會員仲可以獲贈雙倍優惠券！

收集日期：即日起至10月20日
回收地點：屯門市廣場、奧海城、荃新天地、中港城、黃金海岸商場、尖沙咀中心、藍灣廣場、帝庭軒購物商場、YM2 裕民坊之商場禮賓處或服務台
詳情及優惠券條款細則：https://bitly.ws/VAiq

月餅盒回收2023 | 3. 香港百佳超級市場

想更加方便？咁拎去樓下百佳就一定最方便！全港有100間百佳超市都設置咗月餅盒嘅回收收集箱，接受大家剩餘嘅月餅紙盒及金屬鐵盒。不過大家要留意，如果包裝上有塑膠托盤或磁石等其他物料，就要預先自行移除，再將個盒抹乾淨先好投入收集箱呀。

收集日期：即日起至10月13日
指定100間參與店舖：https://bitly.ws/VAjY
詳情：https://bitly.ws/VAjW

原文: https://saucemedia.net/interesting/%E6%9C%88%E9%A4%85%E5%9B%9E%E6%94%B62023-%E4%B8%AD%E7%A7%8B%E6%9C%88%E9%A4%85-%E7%92%B0%E4%BF%9D-27878/