【環保基金 食享沙田】大圍街市收菜日常
2021年08月24日
【環保基金 食享沙田】大圍街市收菜日常
繼上次到馬鞍山體驗前線剩食回收工作，小編今次到大圍街市體驗一下，都係跟沙田婦女會去救食。沙田婦女會喺大圍街市紮根多年，區內嘅街市剩食回收工作唔經唔覺已踏入第十個年頭。
當晚出發前依然係烏雲密佈，我哋都非常擔心回收工作可能要喺落雨嘅情況下進行。幸好，天公造美，喺整個回收行動都無落雨，非常感恩。我哋喺大約晚上7點趁商戶就快收檔先去回收，盡量喺唔影響到佢哋做生意嘅情況下救食。商戶都好熱心咁將佢哋部分賣剩嘅食品捐贈俾我哋，亦有商戶主動將剩食搬到我哋嘅手推車上。由於商戶們都好踴躍，整個收菜過程差不多半個鐘，我哋收到為數不少嘅蔬菜，非常感激商戶佢地嘅捐贈同支持！喺現場作簡單分類之後，我哋就推住沉重嘅手推車返回其中一個派發地點 – 沙田婦女會新田總會。返到總會後，我哋將蔬菜秤重作記錄及篩選分配，完成分配剩食工作後就等待晚上8點20分嘅派菜時間。
我哋逢星期一至五晚都會將呢啲唔回收就會被丟去堆填區，但其實仲可以安全食用嘅剩食，同大約20-25個有需要嘅街坊或家庭分享。一到晚上8點20分，街坊都好有秩序咁排隊拎回收嘅蔬菜。我哋唔駛半個鐘就將當晚所有回收得來嘅蔬菜分派到有需要人士手上，大家都惜食不浪費。以上就係我哋大圍呢邊嘅回收工作日常。